處理拗柴🤕，小心魔鬼😈在細節！

「拗柴」絕大多數人都會經歷，甚至有部分人經常「拗柴」，慣性「拗柴」。所謂「久病成良醫」，大部分人都知道點樣處理「拗柴」。然而，「魔鬼在細節」，好多人往往係細節上有所缺漏，導致結果差強人意。今日就等姚醫解析下「拗柴」既一啲需要注意既「細節」位啦！

黃金治療期⌚

大多數病人「拗柴」都會選擇觀望下先，睇下佢會唔會自己好反先。殊不知咁就錯過咗「拗柴」既黃金治療期。無錯，好多時候一啲比較輕微既「拗柴」，又或者年輕力壯既朋友仔係「拗柴」之後都會俾啲時間「抖抖」🛌🏾等自己好返。但有更多時候「抖極」都唔好，於是來求診，結果就錯過咗「拗柴」既黃金治療期。

「拗柴」既黃金治療期係受傷後1-2星期，尤其係頭嗰1星期，若果係受傷初期就接受適當而正確既治療，出來既結果可以差好多！唔好以為姚醫危言聳聽，有好多病人就係因為延期治療，結果需要更長既治療週期來康復，而且大大增加咗往後踝關節患「風濕」既風險。

所以，唔小心「拗柴」，三兩日都唔見明顯好轉，就應該盡快求診，千𧘻唔好一拖再拖。

凍🧊/熱敷🔥

「拗柴」咩時候熱敷/凍敷我哋之前已經探討過。總結就係：

⦁ 止痛為主就凍敷，加快恢復就熱敷；

⦁ 紅腫熱痛比較犀利就凍敷，否則就熱敷；

今日主要係想講下熱敷/凍敷既時間。有唔少人認為熱敷/凍敷時間越長越好，NoNoNo!!無論係熱敷定凍敷，時間太短，達唔到治療目的，時間太長，有機會凍傷或燙傷。熱敷/凍敷一般建議時長為10-15mins，但又唔應該局限係呢個時間，因為唔同人對冷熱既耐受性具有明顯既差異。

姚醫曾有一個病人，熱敷時並唔覺得太熱，熱敷咗15mins後都無任何不適，但回到家後熱敷既位置起了數個大小不一既水泡。

所以，基本上凍敷/熱敷既時候，只要局部皮膚泛紅便表示局部已受到足夠的刺激，可以停止凍敷/熱敷了。當然，即使皮膚顏色無明顯變化，凍敷/熱敷時長都盡量唔好超過15mins，因為未必個個人都有明顯膚色變化嫁嘛。

（點解有種講完等於無講既感覺既XDD）

運動🤸

「拗柴」後可唔可以做運動？

“醫師你當我傻嫁？「拗柴」後梗係唔可以運動啦！”

NoNoNo!!呢個講法太絕對啦！「拗柴」既初期（1-2周），腫痛比較犀利既時候，當然唔適合做同踝關節相關既運動，唔會動用到踝關節既運動其實都可以照做。例如坐位既上身運動，又或者躺臥位既核心運動等。

而「拗柴」既中、後期，踝關節既痛並唔明顯，主要係扯緊、酸軟無力既感覺為主，某啲特定既動作會誘發輕度至中度疼痛。呢個時期其實係可以，亦都建議患者做非劇烈運動，因為適當既運動對呢一類陳舊性損傷有正面既作用，而且可以減低患「風濕」💦既機會。